الثلاثاء، 19 يوليو، 2011

حطب دامة

حطب دامة تحركني الدنيا ووين ماتبي توديني
ابي ارجع خطوة الورا بس قانون اللعبة ما يخليني
تعبان من دنياي يا يما وشهو طريج الفوز دليني
كل ماجيت اشيخ عليها تاكلني وتخسرني وتبجيني
راح ابونا اللي كان يعلمني ويوجهني ويباريني
مثل خيمة تظلل علي الشمس وعن حرارتها يداريني
ولا طحت يقومني ويمسك ايديني ومن امرض يداويني
ما ظنيته بهالسهولة يغمض عينه ويرحل بعيد ويخليني
ويترك وراه الشوق واللهفة والالم وخياله سرا فيني
زوايا البيت تبجيه وتنحب حزنانه وبالليل النوم جافيني
اطالع صورته واكلمه مايرد يما قوليله يرد ويحاجيني
يما انا شفيني؟ انا مهموم انا حزنان انا فيني مافيني
وتقولين انسى؟ اشلون ابنسى من يحبني ويغليني
انا ما انسى هيبته ومن كان بعطفه وحنانه يغطيني
وكان ودي يابوي بطفل تلاعبه ويلاعبك يناديك ويناديني
تلمه وتضمه لصدرك وتقول ربي يحفظه وله يخليني
وتعلمني شلون اربيه ومن كلامك ونصحك تعطيني
يكفي يادنيا هموم وألم وجراح ترى مافيني كافيني


- Posted using BlogPress from my iPhone

هناك 4 تعليقات:

  1. الله يرحمة انشالله ويسكنه فسيح جناته
    والله ياخوي غصب قريت الشعر والله أول مرة أقرى شعر وأنا أبجي واحنا مابيدنا شي الا الدعاء له

    أخوك/ فيصل كرم

    ردحذف
  2. رحمة الله عليه وعلى اموات المؤمنين والمؤمنات.
    هي الدنيا تعطينا وتعطينا... وتأخذ منا أغلى أحبابنا...

    أسأل الله حسن الخاتمة!!

    ردحذف
  3. يادفان صحت بالله عليك تانيني
    طول بالدفن بودع زهرة سنيني
    الموت يليته بدالك يابويه يلفيني
    فدوة لك العمر يا أجمل رياحيني
    وشلون تتركني وحيد وتخليني

    إنا لله وإنا إليه راجعون

    والله يرحمه برحمته ويغفرله ويسكنه فسيح جناته مع محمد وآل محمد الطيبين الطاهرين
    والبقى براسكم والله يحفظكم ويخليكم لأهلكم وشبابكم

    ردحذف
  4. متى ما استطاع الشاعر أن ينزل دمعة واحدة للقارئ ، أستطيع أن أطلق عليه لفب الشاعر.
    وأبياتك أنزلت أكثر من دمعة من عيني...

    أحسنت. حياتك الباقية وأشكرك على مرورك ومصافحتك لأبياتي.

    فاضل كرم

    ردحذف