ماي العين

أنحب امن البجي من اذكر قَطْعَة جفوفك
وانصب عزية ومآتم إلك إنتَ يا عباس

واسبح بنهر دمعي من أتخيلها جروحك
يسيل الدمع من عيني ويتبلل القرطاس

واغرق ببحر حبك وودي أكون يمك اشوفك
عشقي إلك سيدي ما يقدر يحبسه حبَّاس

ويزيد حبي من أكتب اسمك وارسم حروفك
إنت القمر بعيني سيدي وسط كل هالناس

ياعباس بو الفضل قلي شلون أفكر اعوفك؟!
اسمي اعلى اسمك ولهالسبب رافع الراس

يمتى تجيب الماي أخاف ما تسمح ظروفك!
أطفال وحرم تصرخ وتنادي وينه بطا عباس

أخاف يطول يا ماي العين عالنهر وقوفك
قمر العشيرة إنتَ وإلنا النور والنبراس

أنا ما أريدن ماي أريدن بس يمي أشوفك
إنت إلنا العلم ولو الراية اعلى الأرض تنداس

قلي يابو الغيرة شالِّي جرى وحل بطفوفك؟!
ذكرى مصابك بالقلب وثوب الحزن إلك لباس

ليت قطعوا قلبي ياخوي ولا قطعوا جفوفك
حسين بعدك كسير الظهر ومطأطئ الراس


- Posted using BlogPress from my iPhone

حكمة...

متى ما استطاع الشاعر أن ينزل دمعة واحدة للقارئ والمستمع، أستطيع أن أطلق عليه لقب الشاعر.

فاضل كرم


- Posted using BlogPress from my iPhone

بحر خيالي

قبل لا انام اسرح وافكر فيك يالغالي
اتذكر هيبتك واناظرها ببحر خيالي
وقصص قديمة مرت ارسمها ببالي
انا الشاطي وانت البحر تدغدغ رمالي
لين اجف ترجع وتبللني بمدّك العالي
ابتسم وبداخلي يبجي هذا هو حالي
عقبك يالغالي مدري انا شاللي جرالي
دايم اسرح بفكري والقى صورتك قبالي
ابسألك يالغالي بعدك انا شاللي بقالي؟
مثل طير سكن في عشه سنين وانهدم تالي
ليت من راح راح وبعده القلب سالي...
وعقلي من التفكير ليته يكون خالي...
لكن اشلون ابنسى منهو شانه عندي فووق عالي
فووق ويا النجوم يهيم ويسرح واسرح انا فيه بخيالي


- Posted using BlogPress from my iPhone

حكمة

لا تقل سأزور أبي غداً ، بل ابقى حوله دائما. فلا تعلم متى سيكون الفراق!!

فاضل كرم


- Posted using BlogPress from my iPhone

أسى الحاضر

أما كفاك ما ذقته بالماضي من الأسى أيها الحاضر؟!
كأس الهم تجرعته وما زال معي ومع الأيام يسافر
أحبة توسدوا الثرى وبقية قليلة منهم سوف تغادر
لما العجب من زهدي والأحباب عن دار الدنيا تهاجر؟!
كم هو مر طعم الحياة دونهم وإن كنت للهو أبادر
وكم بنيت آمالا للحاضر الذي اعتقدت بأن يكون زاهر
وما أدراك ، اليوم معك وغدا لدار الآخرة أكون عابر
سريعة أحداثها دنيانا وأضل منها متخوّف وحائر
أخشى من زمانٍ لعبت به وغدا علي يصبح جائِر
فلا أجد هناك بيني وبين الموت أي عائق وساتر
يا قلبي كف عن اللهو وابقى متأهب للحظة وناطر
أرى انني للمقابر انا واخوتي واهلي اليوم زائر
الكل يبكي وينحب ألما والبعض للبعض صار ناظر


- Posted using BlogPress from my iPhone

حطب دامة

حطب دامة تحركني الدنيا ووين ماتبي توديني
ابي ارجع خطوة الورا بس قانون اللعبة ما يخليني
تعبان من دنياي يا يما وشهو طريج الفوز دليني
كل ماجيت اشيخ عليها تاكلني وتخسرني وتبجيني
راح ابونا اللي كان يعلمني ويوجهني ويباريني
مثل خيمة تظلل علي الشمس وعن حرارتها يداريني
ولا طحت يقومني ويمسك ايديني ومن امرض يداويني
ما ظنيته بهالسهولة يغمض عينه ويرحل بعيد ويخليني
ويترك وراه الشوق واللهفة والالم وخياله سرا فيني
زوايا البيت تبجيه وتنحب حزنانه وبالليل النوم جافيني
اطالع صورته واكلمه مايرد يما قوليله يرد ويحاجيني
يما انا شفيني؟ انا مهموم انا حزنان انا فيني مافيني
وتقولين انسى؟ اشلون ابنسى من يحبني ويغليني
انا ما انسى هيبته ومن كان بعطفه وحنانه يغطيني
وكان ودي يابوي بطفل تلاعبه ويلاعبك يناديك ويناديني
تلمه وتضمه لصدرك وتقول ربي يحفظه وله يخليني
وتعلمني شلون اربيه ومن كلامك ونصحك تعطيني
يكفي يادنيا هموم وألم وجراح ترى مافيني كافيني


- Posted using BlogPress from my iPhone

أبسألك يابوي

ابسألك يابوي شنهي الدنيا في عينك

مثل النور اللي اشوفه ساطع على جبينك؟
ولا محملة هموم مثل ما ورمت رجلينك؟!
سولفلي عن اللي مر وراح من سنينك
قولي يالغالي واوعدك ان هالحكي بيني وبينك

شنهي الدنيا يابوي ووش حالها في عينك؟

اتعبني التفكير مثل ما هد المرض طولك وزينك
اجري مثل الدم اللي يجري في شرايينك
ادور عن الفرحة وانته ما تدري عني وينك
الهاك المرض عنا وعلى حالك الله يعينك

اشوفك ساكت ماترد يابوي ومغمض عينك

جاوبني يبا ارجوك وامسح علي بجفينك
يبا وشفي نبضك سكت؟ وشفيها رأتينك؟
آه يابوي مشتاق لضحكة سنك وسواليفك
مشتاق لطيبتك وعطفك الدايم علي وحنينك

جاوبني يابوي.. وشهي الدنيا في عينك؟؟!

ليت اللي راح يرجع وترجع لأحلى سنينك
تصرخ علي لي اخطيت وتصفعني بيمينك
يصعب علي فرقاك وابد ماشفت انا شينك
طيب وحنون ومن تناظرني الله ياحلوها عينك

ليتك ترد وتجاوبني.. شحال الدنيا في عينك؟